Олимпиададағы жүлделер жарысында рейтинг тек алтын саны бойынша (кестеден Рио Олимпиадасындағы елдердің орналасуын қараңыз) ғана есептелетінін түсінбей-ақ қойдым. Тіпті жалпы жүлделер саны да есепке алынбайды екен. Барлығы 70 жүлде алған Қытай бар болғаны үшінші орында, ал 67 жүлдесі бар Ұлыбритания бір алтыны артық болғаны үшін екінші орында тұр.
Қолданыстағы жүлделер есебі
| Орын | Мемлекет | Алтын | Күміс | Қола | Барлық жүлделер саны |
| 1 | АҚШ | 46 | 37 | 38 | 121 |
| 2 | Ұлыбритания | 27 | 23 | 17 | 67 |
| 3 | Қытай | 26 | 18 | 26 | 70 |
| 4 | Ресей | 19 | 18 | 19 | 56 |
| 5 | Германия | 17 | 10 | 15 | 42 |
| 6 | Жапония | 12 | 8 | 21 | 41 |
| 7 | Франция | 10 | 18 | 14 | 42 |
| 8 | Оңтүстік Корея | 9 | 3 | 9 | 21 |
| 9 | Италия | 8 | 12 | 8 | 28 |
| 10 | Австралия | 8 | 11 | 10 | 29 |
| 21 | Өзбекстан | 4 | 2 | 7 | 13 |
| 22 | Қазақстан | 3 | 5 | 9 | 17 |
Орындарды бөлудің бұл қағидасын дұрыс емес деп санаймын.
Күміс және қола жүлделер мүлдем ескерілмейді. Сонда біз Василий Левит, Елдос Сметов, Жазира Жаппарқұл, Әділбек Ниязымбетов сынды тамаша спортшыларымыздың күміс және қола (алтынға бергісіз) жүлделерін қалай елеусіз қалдыра аламыз.
Бұл кесте спортшылардың жылдар бойы төккен маңдай тері мен қажырлы еңбегін ысырып тастай салғандай көрінеді.
Бұл әділетсіздік қой!
Меніңше жалпыкомандалық есепте барлық жүлделер есепке алынуы тиіс. Мысалы, алтын үшін үш ұпай, қола – екі ұпай, күміс – 1 ұпай. Нәтижесінде әр жүлде елдің орынына әсер ететін болады.
Кестені осы қағида бойынша қайта жасап шықтым, нәтижесі мынадай.
Ұсынылып отырған жүлделер есебі
| Орын | Мемлекет | Алтын | Күміс | Қола | Жалпы ұпай саны |
| 1 | АҚШ | 46х3=138 | 37х2=74 | 38х1=38 | 250 |
| 2 | Ұлыбритания | 27х3=81 | 23х2=46 | 17х1=17 | 144 |
| 3 | Қытай | 26х3=78 | 18х2=36 | 26х1=26 | 140 |
| 4 | Ресей | 19х3=57 | 18х2=36 | 19х1=19 | 112 |
| 5 | Германия | 17х3=51 | 10х2=20 | 15х1=15 | 86 |
| 6 | Франция | 10х3=30 | 18х2=36 | 14х1=14 | 80 |
| 7 | Жапония | 12х3=36 | 8х2=16 | 21х1=21 | 73 |
| 8 | Италия | 8х3=24 | 12х2=24 | 8х1=8 | 56 |
| 9 | Австралия | 8х3=24 | 11х2=22 | 10х1=10 | 56 |
| 10 | Оңтүстік Корея | 9х3=27 | 3х2=6 | 9х1=9 | 42 |
| 21 | Қазақстан | 3х3=9 | 5х2=10 | 9х1=9 | 28 |
| 22 | Өзбекстан | 4х3=12 | 2х2=4 | 7х1=7 | 23 |
Алғашқы ондықтағы орындар айтарлықтай өзгерді. Франция Жапонияны басып озып, алтыншы орынға көтерілді. Оңтүстік Корея сегізінші орыннан оныншыға сырғыды. Ең бастысы, Қазақстан бір саты жоғарылап, өзбек ағайындардың алдына шықты. Иә, олардың бізден бір алтыны артық, бірақ күмістен үш жүлдеге, қоладан екі жүлдеге алда тұрмыз. Сондықтан жалпы есепте де жоғары тұруымыз керек.
Сонымен жалпыкомандалық есептегі жиырма бірінші орынмен барлығымызды құттықтаймын!
P.S. Әрине жоғарыдағы есеп ресми емес және Халықаралық олимпиада комитетінің сайтында жарияланбайды. Олимпиадалық жүлделер жарысы ресми сипатқа ие болмаса да, әрдайым әлем жұртшылығының назарында (әйтеуір Google іздеу бойынша осы осы кестені шығарады) және онда тек қана алтындар саны есепке алынады. Бұл қағиданы өзгерту қажет сияқты!)))
COMMENTS